ՀՀ նախագահի մամուլի ծառայություն
«ՆԱՏՕ-ն արժեւորում է Հայաստանի հետ համագործակցությունը»
Տարածաշրջանային այցով Հայաստանում գտնվող Կովկասում եւ Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Խավիեր Կոլոմինա Պիրիզն ասել է, որ Հյուսիսատլանտյան դաշինքն արժեւորում է Հայաստանի հետ համագործակցությունը եւ կարեւորել քաղաքական երկխոսության շարունակումը:
Այս մասին նա ասել է ՀՀ նախագահ Արմեն Սարգսյանի հետ հանդիպմանը:
Արմեն Սարգսյանը կարեւորել է ՆԱՏՕ-ի հետ Հայաստանի բնականոն համագործակցությունը եւ գործընկերային հարաբերությունները: Նա նշել է, որ Հայաստանը շարունակում է իր կարեւոր ներդրումն ունենալ խաղաղության ու կայունության հաստատման միջազգային հավաքական ջանքերում:
Արմեն Սարգսյանն ու ՆԱՏՕ-ի գլխավոր քարտուղարի հատուկ ներկայացուցիչն անդրադարձել են պատերազմից հետո մեր երկրում եւ տարածաշրջանում ստեղծված իրավիճակին, զարգացումներին ու մարտահրավերներին:
Նախագահը եւս մեկ անգամ ընդգծել է, որ անհասկանալի ու լուրջ խնդիր է 44-օրյա պատերազմին ՆԱՏՕ-ի անդամ երկրի՝ Թուրքիայի ակտիվ ներգրավվածությունը, որի մասին նա բարձրաձայնել էր նաեւ 2020թ. հոկտեմբերին ՆԱՏՕ-ի կենտրոնակայան այցի ընթացքում:
